La Zenite la z’era na tosata de quele pròprio ben corportae. Na tosata de quele che tute le mame le ghe piasaria de gaver na fiola compagna: la ndea a messa tute le doméneghe;

La Zenite la z’era na tosata de quele pròprio ben corportae. Na tosata de quele che tute le mame le ghe piasaria de gaver na fiola compagna: la ndea a messa tute le doméneghe; la dizea su el rosàrio, tute le note e la savea tuti i mestéri, de mente; la gavea sempre scapulàrio picà ntel col; la savea far tuti i lauri de casa e la gavea anca na bela dota par maridarse.
Quando che la se gà catà fora el primo moroso, l’è stà un spavento de l’altro mondo. Robe de cascar zò el quèrcio de a cesa. La mama e el pupà no i volea savérghene che la tosa la stesse insieme co’l moroso. Fin el vigàrio l’era contràrio.
Ben, la prima volta, che’l moroso el ghe gà dato un baseto ntea fàcia, la gà fin perso el fià. Ma, ala doménega drio, la ze ndada drita confessarse.
Ma te sè come che la zè la natureza: scalda... scalda... Sbrìssia quà, sbrìssia là, fin che ciapa fogo da par tuto.
Un sabo, so pare e so mare de la Zenite i ze ndai a un casamento, e i gà assà la fiola casa, ela sola insieme co el moroso. Maienàrsela! Gà sucedesto quel che se spetea pó. Ma, a matina ben bonora, che l’era doménega, la Zenite la ze ndata confessarse:
– Padre, – la gá dito, – ieri, son stà casa mi sola, insieme co el me moroso. Sol nantri due. E la gà sucedesto, padre!
Cossa che gà sucedesto, fiola?
– Gà sucedesto quel che no l’è mia par suceder vanti del casamento.
El padre, robe che’l salte fora del confessionário. El ghi nà dito su un paco, e par ùltimo el ghe gà parlà cossita:
Tudo bem, tudo bem, fiola. Pa sta volta, te dao la bsovilssion, ma mantra volta, no stà gnanca vègner conferssarte, che no te perdono mia pi. E pa via che te gh’è fato el pecato mortal, par penitensa, te toca dir su due rosari.
Alora, la Zenite la ghe gà respondesto:
– Padre, invessse de pregar sol due rosari, posso pregàrghene quatro, de na volta, parche, sabo che vien, resteremo casa, nantra volta, sol mi co’l me moroso. Alora mi prego na penitensa adiantada, padre, e no ocore gnanca che vegne confessarme, doménega che vien.
É... Dopo che i gà catà la strada, gnanca coi rosári no i se ferma mia pi.