L’era belche araquanti mesi che la fémena la se lamentea che la gavea le maròide che ghe fea mal

L’era belche araquanti mesi che la fémena la se lamentea che la gavea le maròide che ghe fea mal. Alora quando che la ghe ga dito al so omo che la ndea al dotor, lu el ghe ga dito che’l volea ndar insieme, parché el volea veder che esami che el dotor ndaria farghe e anca parché el savea che la so dona la zera preocupada par via dele maròide.
La fiola pi vècia, che la zera de studiar ntea Faculdade, quando che la ga savesto che la mama ndea consultarse e che el pupà ndaria anca lu, la ga volesto ndar insieme anca ela.
Intanto che i zera drio ndar a pie, la fiola, che la zera ntela Faculdade, la ghe ga dito de incontro a so pare:
– Pupà, quando che el dotor el va dimandar cossa che la mama la ga, no sté mia dirghe che la ga un problema ntel bus dedrio, che resta bruto davanti el dotor.
– Si, ma alora ghe digo che, mi?
– Diseghe che la ga un problema ntel anus.
– Ma cossa zelo sto anus?
– El anus, el ze la medèsima roba che el bus dedrio, sol che el ze un nome sientìfico.
– No stà preocuparte, fiola, che mi sò cossa far.
Quando i ze rivai là del dotor, la mama e el pupà i ze ndai rento ntel consultòrio e la fiola la ze restada là ntela sala de spera. 
Quando che el dotor el ghe ga dimandà cossa che i gavea, la fémena no la ga gnanca fato de ora de verder la boca che el so omo el ga dito:
– El problema qua el ze cola me dona. 
– Si – ghe ga dito el dotor – che problema gala?
– Ze araquanti mesi che la se lamenta che ghe fà mal, che ghe fà mal e che ghe fà mal, e no sò pi cossa far.
– Si, ma ghe falo mal onde?
– Ghe fà mal ntel...ntel...ntel... Porco cane, spitì un pochetin che vao là dimandarghe ala me fiola. 
El ze ndà là fora ntea sala onde la fiola la zera drio spetar insieme con nantre sinque, sei persone, el ghe ga dimandà:
– Ciò, fiola, come zelo pròpio el nome sientìfico del bus dedrio dela to mama?