Ntel di 19 de agosto ghemo bio la incoronassion de la corte de la 15ª Fenavindima

Ntel di 19 de agosto ghemo bio la incoronassion de la corte de la 15ª Fenavindima: regina Paula Bebber e principesse Bruna de Oliveira Marini e Caroline Foss Lovison. La Festa Nassional de la Vendema de Noa Trento (Flores da Cunha) la và esser fata de 22 de febraro a 10 de marso de 2024. Desde la prima Fenavindima in 1967 ghen’é sempre stata una regina e due o depì principesse. Rivando darente i 60 ani de la nostra pi granda e pi importante Festa bisogna tornar indrio e veder el parché de incoronar ste tose. 
Sti ani el sistema patriarcal l’era la maniera de funsionamento de le fameie. Ghe vol dir che el omo, el pare de la fameia, el comandea e la dona e i fioi i lo scoltea. I fioi òmeni i guadagnea terra come eredità e le fiole done la dota e la màchina de cosir quando le se maridea. Quando sucedea che morria el pare l’era el fiol pi vècio che passea a comandar. Tanti, vardando del dì de ncoi indrio, i pol dir che l’era un sistema “machista” e questo che quel. Ma l’é stata questa maniera de veder e far el mondo che ga mantegnesto la società inpié par tanti ani.
Le done no le gavea tanta vose par comandar... Ma chi stùdia un pochetin se nicorde che par dir la verità le done taliane le é stae le vere eroìne de la nostra stòria. La dona, quando la se maridea, quasi sempre la assea la so casa e la ndea de star co i sogri. Lì acontessea el primo “choque cultural” e la sposa ghe tochea sbassar le recie e “balar ntel ritmo” de la nova fameia. Co’l tempo i ndea de star in altro posto o ghe tochea tender i sogri. Ma no ghen’era tanto tempo de lamentarse, parché ghe tochea far fioi, un drio l’altro, par gaver gente par laorar e cristiani par pregar. 
Ma la mare la era e continua a esser, come se dise popularmente, tre dei quatro sataroni que mantien la fameia in pié. La dona la laorea in colònia, la tendea la casa, la fea de magnar e anca la induchea i fioi. Con tuto questo saria beche na vita de tanto patir, ma quando el omo l’era cativo o tristo, de le volte anca ciucheton, l’ora la deventea na vita ancora pi mara. Nantra volta parlemo de la fede. Ma si, se pol dir che se no fussi la fede catòlica le done taliane no le gavaria bio forsa de tirar avanti. Disendo su’l rosari tuti i di, ndando Messa a la domenega e tante altre orassion e devossion, le deventea le “Madone” de le case.
E che gale de veder ste robe e ste stòrie co la regina e le principesse? La corte de la Fenavindima la mantien viva la figura de la dona taliana. No co la facia e el corpo patii del laoro, ma de na maniera “transfigurada”. Vardar ste tose l’é come veder le nostre none e bisnone là su in paradiso: con bele còtole e vestì, recini, corai e la corona de oro in testa. Par quela ve digo Paula, Bruna, Caroline e tute le 13 embassatrisse: gavé el onor de representar le done taliane dei quasi 150 ani de la imigrassion. Representar e mostrar a tuti de Noa Trento (Flores da Cunha) e anca ai turista la stòria che corre nte le vene de la nostra terra. Le nostre none e bisnone le sarà gran contente de vederve e scoltarve. Bon laoro a tute valtre!

Ciàcole

I Dotori i ze tuti cossita

– Bon giorno, comare, come steto?
– Ah, son qua meso mal ciapada, che me fà mal a gamba che guai. Par la Madonina, comare, e ti?
– Ma no stà gnanca parlar, comare. Eeeeh... adesso che ga tacà sfredar, scomìnsia le malatie.
– Ah, si, adesso se sente gente tossir in tuti i contoni.
– Me ga tocà ndar al ospedal sta matina: e mal a gola, e tosse, e mal a testa, mal da par tuto. Rivo là, e lora el dotor el me ciama rento. 
“–Tudo ben coa sinhora?” 
– Ah, go dito, se mi stea ben, no zera qua, èh! Alora el ga volesto saver cossa che gavea. Ah, querrido, go dito. Mal da par tuto, caro da Dio! Ga scominsià el fredo, i vècii scomìnsia, lori...Ma alora el volea saver cossa che gavea magnà de zanta geri sera.
–  Ah, go dito, caro, go magnà polenta brustolada, formaio coto, un pochetin de grépole, un toco de salame e na cìcara de late. Alora el me ga dito cossita: 
“– Ah, ma se a sinhora continuà comendo essas coisa, a vida vai sê curta, vai morê logo”. 
 El ga ciapà na carta e scomìnsia scriver cossa che no podea magnar. Alora el ga metesto su che no podea magnar salame, carne rostia, gnanca grépole, e late, e gnanca formaio, la pana e gnanca el botiro. E mi son fermada, lo go vardà cossita e go pensà mi sola:  ti, sfurbon, ti te sì quel che  vol copar tuti i vècii dea fame? Magina se sarà vera che magnar salame, grépole, botiro, carne rostilha,  morimo presto. Va là, va là!
– Ah, i dotori i ze tuti cossita, comare.
– Dopo, magari, son ndata là fora, lo go capio. Signor bendito!  Ghen era sete vecioti come mi, sentai là che i spetea la so ora. Go sentio fin spussa de schito de galina. Go vardà, go vardà in torno e gnente. Me go ricordà che vanti de ndar consultarme, zera ndata ntel punaro portarghe mìlio ale galine.  Ciò, varda soto la me scarpa, ghin avea portà via mi un schiton tacà ntel taco. Alora si go capio par ché!  I vol mia pi veder vècii smarsi come mi. Par quela che ve digo, se gavé qualche malatia, no sté ndar al ospedal. Feve un sià, ndé soto le querte, magné un per de scuciarade de miel, parché, sinò, no torné mia pi indrio, hè! Quili  che i va na volta, i torna mia pi indrio! I vol finir fora con tuti i vècii. Mi go belche dito al vècio: scomìnsia el fredo, se impiemo el fogo... vui méterme la gamela dedrio del fogon par mantegner l’àqua calda. Se lavemo i pié vanti ndar dormir, che semo gnanca mati ndar tomar bagno con quel fredo li e ciapar na palmonia ncora.
– Si,si, te ghè rason, comare. I dotori i ze tuti cossita!