– Sacramegna, comare, gheto scoltà chi che ze morto, che i gà messonà là ntel campanil?

– Sacramegna, comare, gheto scoltà chi che ze morto, che i gà messonà là ntel campanil?
– Dio Santo, son mia stata bona de capir, parchè, giusto ntela ora, ga passà el camignon dela prefetura.
– Si, ma gheto visto che dopo che gà scuminsià l’inverno, ghin more un al giorno?!
– È... El dizea sempre me poro pupà, che “quando scumìnsia cascar le foie de le piante, scumìnsia cascar anca i veci”.
– Si, si, comare, se la và cossita, de quà un paro de ani, no gh’è stà gnanca pi i morti ntel semitero.
– È, ma adesso ghin’è tanti che i se fà brusar, alora resta sol le sènare, che le ciapa poço posto.
– Mi nò, par intanto no vui che i me bruse. E dopo, nel giorno del Giudìssio Finale, quei che i se brusa, vali farse veder davanti il Signor sol co le sènare?
– Noantri, intanto, gavemo belche combinà che nessun dela nostra fameia vol brusarse. Par quela che semo ndrio far nantri due andari ntela tumba dei noni, che alora ghe stemo tuti.
– Si, ma gavio pensà che valtri sì in quìndese fradei? E dopo vien anca le nore, insieme... Sarà che ghe stè tuti, mò?
– Nó, ma i fà cossita: dopo de due, trè ani che un l’è morto, i ghe tol su sol i ossi e li mete nte na casseta insieme co’nantro.
– Si, ma alora la vien fora compagna de quei che i se fa brusar.
– Come, cossita, comare?
– Si, parchè ntel giorno del Giudìssio Finale, quando che sona le trombe, ntela prèssia, i pol sbaliarse, e torse su i ossi tuti misturai, un col’altro!
– Ben, ben, comare, se bisogna star quà preocuparse anca dopo che semo morti, saria meio gnanca morir de na volta...
– Digo anca mi, che la saria meio pròpio...
– Ben, ma vanti de là, gavemo tempo de pensarghe sora. Ciao, ciao, comare e steme ben...
– Ciao e steme ben anca vu...

*Ivo Gasparin