- Comare Angelina, ma quanto tempo belche che no te vedea!

– Comare Angelina, ma quanto tempo belche che no te vedea!
– Sì, sì... l’è tuto un corer par de quà e par de là, che no go gnanca bio pi tempo  de ndar a messa.
– E la to sorela, quela che a ze de star la zo  in colònia, come ze che a và?
– Ah, a Matilde? Zeo tempo che no te la vidi pì? 
– Dieze ani, securi.
– Ben, se te a vedissi adesso!  A ze la grossa che gnanca un pin. A ghin fa trè de mi. Quando che a se senta zo, in ciesa, la ciapa meso banco ela sola.
– Maria Santíssima!
– Dopo,  la ga la salute che no a ghe iuta mia tanto, nò. El dotor el ghe  ga spiegà,  che’l so sangue el ghe và tuto zo pa e gambe, e dopo no l’è pì bon de  vegner in su, parchè la ga la pansa massa grossa  e el fa fadiga   de farghe  a volta. E dopo, anca, el dotor el ghe ga dito che la gà la bobina massa alta ntel sangue…
– Ma Senhor benedeto!
– Sì, sì... la me ga dito che a ghe toca far na mamografia pa e gambe, par veder cossa che vien fora.
– M’alora,  no la ze mia na mamografia. Parchè anca la me sorela la ga fato la mamografia, ma quela la ze pa e tete.
– Alora no sò dirte che ezame che’l sìpie.
– Saralo mia na topografia, dele volte?
– Pròpio... na topografia, comare.  Adesso me gò ricordà...Na topografia...
– El giorno de incoi, i dotori i manda  far ezame da par tuto. Se a me fiola, che par fenir la faculdade, la ze ndrio far na mamografia anca ela, con vinti ani... Ze belche un trè mesi che la ze là tute e note che la seita scriver, scriver sora sta mamografia...
– E el to fiol pì vècio, laórelo ncora in Cassia?
– Gheto mia savesto gnente?
– Nó... Parchè galo sucedesto chè?
– Ma tasi, comare, che’l se ga squasi copa. El ga batesto l’auto nte un palanco dea luce. Ncora ben che’l se gavea comprà un auto de quili moderni, parchè se no’l gavesse mia l’imberghe, el saria morto seco.
– Maria Santíssima, comare.
– Si, si... gràssie a Dio che ga storà l’imberghe.
– É, el me omo el me ga spiegà  che  adesso i auti i vien fora co sto imberghe, che l’è che gnanca un balon, che quando i auti i dà na pessada, el imberghe stora ntel peto del sofero.
– Gràssie a Dio, comere. Manco una che i ghin fà de bona.