Gioanin, l’è sempre està meso birbo, ncora de scàpolo. Sempre drio a done.

 Gioanin, l’è sempre està meso birbo, ncora de scàpolo. Sempre drio a done. Dopo che’l se ga maridà, no’l ga mia perso el vìssio nò e, par sora, el ga sempre laorà con auto de prassa, alora restea tuto più fàcile: el ghe disea a la fèmena che’l gavea de far na corida, invesse lu ndea drio a done.

Na volta, i gavea de ndar a un casamento de un cugnà suo, che stea zo a Porto Alegro. Alora i ga conbinà tuto polito che i’ndea zo co l’auto de Gioanin: lu, la so dona, e la sogra, parchè el sogro l’era belche morto.

L’era un bel sabo. I se ga partio de Flores da Cunha, pena dopo meso giorno. Un caldo de morir. Quando i zera ndrio ndar zo pa’l monte de là de Faropilha, Gioanin el ga sentio un mestier che ghe batea su pa’i calcagni. El ga vardà e el ga visto un paro de scarpe de dona. Ghe ze vegnesto su un sudor fredo ntel filon dea schena. El se ga recordà sùbito: “Sacramegna... geri sera go fato el programa co’una dona, e che a maledeta là, la se ga mia desmentegà le scarpe rento nte l’auto?.. Far chè adesso? Se la me dona la vede le scarpe, la me copa...” Alora, el ga fato finta de gratarse e gambe e el ga ciapà le scarpe in man. Dopo che le ga ciapae, el ga tacà ndar pimpianeto co l’auto, e quando che l’era squasi fermo, el ga verto a porta par far finta de vardar i penei, e el ga trato le scarpe ntea valeta. Alora el ga sospirà fondo come se’l gavesse perso dusento chili. El ga continuà el viaio, co’l cuore levian come un oseleto.

I ze rivai a Porto Alegro squasi ntea ora del casamento. Quando che Gioanin el ga fermà l’auto davanti la ciesa, la so sogra, che la z’era sentada de drio de lu, la ga osà:
– Orco de un cane, onde zele le me scarpe?
L’è stata la ora che Gioanin el ga visto che’l gavea trato via, ntea valeta, le scarpe de la so sogra. E mai nessun no le ga pi viste.