Mi no go mai capio come che la gente...

Mi no go mai capio come che la gente la parla tanto mal dele sòcere. A mia, par esémpio, no la me gai mai fato gnente, se ben che, magari, no la go gnanca cognossesta.
Ma, sti giorni indrio, ghen’era na trupeta là ntea bodega che i parlea de done, de futibol, de política, e anca de le sòcere.
Alora, el pi furbo el ga dito cossita: mi so’ndrio farme su na casa nova e vui farla tuta tonda, no vui che la gàpie nhanca um canton, gnente, tuta tonda.
– Ma par che, tuta tonda?
– Parche l’altro di la me sòcera, quando che la ga savesto che mi ndea farme su a casa la me ga dito: no stà mia desmentegarte de far su un cantoneto anca par mi par quando che resto pi vècia.
Nantro l’è saltà fora e el ga parlà cossita:
– Mi ghe go belche dito a la me dona, che quando che moro, che no stae mia menarme ntel semitèrio. Vui che i me bruse e che i trae le sénere rento ntel rio.
– Madona Santa, brusarte e trar le sénere ntel rio? Ma par chè?
– Parche l’altro giorno la me sòcera la me ga dito cossita: se’l Segnor el me dà la gràssia de morir dopo de ti, quando che te si là ntel semitèrio, vui ndar là e pestarte dosso in sima la tumba onde che te si enterà.
E nantro, alora el gà parlà cossita:
– Mi, là casa, go mandà che i ghe taiesse via a coa del cagneto?
– Ùstia... anca quela adesso, taiarghe via a coa del cagneto par chè, poareto?
– Parche tute le volte che la sòcera la vegnea la casa, el cagneto el seitea trar a coa de contento, e mui no vui savèrghene che là nte la me casa nessun reste contento quando che vien la me sòcera, gnanca el cagneto.
Cossita, pó, la ze la stòria co le sòcere... Pore can anca ele...