La quarentina
Dà par imaginar che no l’era mia fácile.
Sti ani, quando na fémena la guadagnea un fioleto, i gavea el costume de far la quarentina; ma nó sol la fémena, anca el so omo el ghe tochea far sta quarentina. La quarentina la zera cossita: dopo che nassea el fioleto, el pupà e la mama i stea quarenta giorni sensa far amor. Dà par imaginar che no l’era mia fácile. Sucece che Toni e Bepi i zera compari e vizigni. Toni stea in sima el monte, e Bepi stea la zò ntel pian. Na volta, quando che la fémena de Toni la gà bio un fioleto, i ghe gà tocà far la quarentina. Dopo che i zera passai in torno de trenta giorni, deromai Toni el zera belche ndrio deventar mato. Quando che la fémena de Toni la ga visto cossita, un giorno lo ga ciamà e la ghe ga dito:
– Son ndrio veder che cada giorno che passa te si ndrio restar sempre più nervoso. Ciapa quà sinquanta cunti e vai a Cassia cavarte la spissa de na volta.
Toni el se gà metesto sul le robe de festa e l’è ndà ciapar l’ónibus. Ma quando che l’era ndrio passar davanti la casa de Bepi, vien fora la comare e la ghe dimanda:
– Sito ndrio ndar onde, Toni?
– Ah, te sè, comare... Come che son de quarentina, la me fémena la me ga dato sinquanta cunti par che vae a Cassia cavarme la spissa.
– Siiio booon...compare, se a ze par quela, dame i sinquanta cunti a mi, e no ocore che te vae fin a Cassia, nò...E par sora, te sparagni anca i soldi de a passaze.
Infinal, i ze ndai de acordo, e Toni l’è tornà in drio. Quando che l’è rivà casa la so dona la ghe gà domandà:
– Sinto belche ndà fin in Cassia?
– Nò, nò, cara... – ghe gà respondesto Toni – Gò gnanca quastà i soldi de a passaze. La comare, la fémena de Bepi, la me ga fato sparagnar el viaio.
– Si, ma i sinquanta cunti onde zeli?
– Li ghi go dati a la comare, pò...
– Maledeta de na vaca... Tute le volte che’l compare Bepi el ga bio de bisogno, mi no ghe gò mai cobrà gnente...