Ghen era un, na volta, che el gavea tanta gelosia, tanto siume cola so dona, che ela no la podea ndar fora dea porta dela casa sensa che lu no ndesse insieme

Ghen era un, na volta, che el gavea tanta gelosia, tanto siume cola so dona, che ela no la podea ndar fora dea porta dela casa sensa che lu no ndesse insieme. 
Se rivea qualche vìsita e se ghe fusse un omo, lu el ghe stea ntea banda dela dona fin che i ndese via dea paura che l'omo el ghe desse na ociada ala so dona. 
Quando che i ndea ala messa, el se indanociea sempre darente ela par che nissun la vardesse. Sta pora fémena la vivea stofegada.               
Se la se metesse a parlar con qualche omo, lu l'era belche là darente par scoltar cossa che i zera drio parlar. Nò che la fusse tanto bela come na regina, ma, infin, el gavea quel bruto vìssio, se pol dir, na malatia.
Ma sucede che, un giorno, sta dona la ga scominsià a sentir dolori, malatie de fémene, pò, e la ghe ga tocà ndar al dotor. Ben, no ocore gnanca  dir che el so omo, ala note vanti de menar la dona al dotor, el ga passà la note in bianco, dela preocupassion.
Infin, el giorno drio l'è ndà menarla al dotor. Vanti de rivar là el ghe ga fato tute re recomandassion: che no la ghe mostrasse i denti al dotor; che no la ghe parlesse gnente, parché lu el savaria cossa parlar; che no la se cavasse zo le robe e che questo e che quel.
Quando i ze rivai là ntel consultòrio e che el dotor el ghe ga domandà cossa che la gavea, ela no la ga parlà gnente. El so omo el ga sol dito cossita:
- Par la me idea, la ga la malatia de tute le fémene.
Alora, el dotor el ghe ga comandà che la se butesse sora la maca. Dopo che la zera la butada, el dotor el ga scominsià a palparghe ntea testa e el ghe ga domandà se la sentia qualche incòmodo. La fèmena no la parlea gnente, la fea sol moti cola testa. Dopo el ga scominsià palparghe ntel col, ntel peto, ntela pansa e el ghe domandava se la sentia qualche dolor. E ela sempre a far de nò cola testa. Quando che el marito el ga visto che el dotor el ghe palpea sempre depì in zo, quando chel ze rivà ntel bigol dea pansa, l'omo, che l'era belche coi òcii fora dea testa, el ghe ga dito al dotor:
- De qua in zo, dotor, vu fé sol le domande e podé assar che mi palpo.