La Matilde la zera na tosa teimosa che gnanca na mula impacada. Quando che la dizea de far na roba, no ghen’era cristi de tirarghe via la idea. Alora, na bela doménega, la Zé ndata iutarghe so pare a molar e vache ntel potrero.

La Matilde la zera na tosa teimosa che gnanca na mula impacada. Quando che la dizea de far na roba, no ghen’era cristi de tirarghe via la idea. Alora, na bela doménega, la Zé ndata iutarghe so pare a molar e vache ntel potrero. Quando che la gá visto el caval Tordilho, la ze deventada mata:
– Pai, incoi vui montar su ntel caval Tordilho, come che gó visto ntea televison, che i cavai i salta sora le stanghe.
– Pa mor de Dio, fiola – ghe gá dito so pare – montar su ntel Tordilho, gnanca palar. El Tordilho l’è massa cativo, cara.
Alora la Matilde la gá scumissià sberegar: la gá tacà dir che so pare no el ghe fea mai um gusto... E che questo e che quel... Fin che so pare el ghe gá dito:
– Ben, se te vui montar su ntel Tordilho, te pol montar, ma dopo no sta mia dir che no te gó mia visà.
La se gá metesto su i stivai, le spore e tuto quanto.
Pena che la gá saltà su e che’l caval el gá sentio le spore ntea pansa, guaia Dio: el gá scumissià a salti che parea fin che’l gavesse un samo de brespe soto a coa. Alora La Matilde la gá tacà a osar e a ciamar zo tuti i santi: San Piero! San Cristóvão! SantAntóni! San Luigi! San Martinho! San Giorgi! San Giusepe! Santo Ángelo Custode! E el caval el saltea sempre di pi.
Quando che so pare el gá visto che’l caval el saltea par via che a tosa a ghe russea le spore su pa a pansa del caval, el ghe gá osà:
– Verdi e gambe, fiola!
Quando la gá verto e gambe, el caval el se gá fermà de colpo.
La ze saltada zo del caval, tuta spaurada, tuta sudada. Alora el pai el ghe gá dimandà:
– Gheto impará adesso, fiola?
– Go impará si pai. Go impará che dá de piú resultado verder le gambe, che ciamar zo tuti i santi.