I conta che gnen’è stà un tal de Toni. Lera un giovanoto pena maridà, ma El gavea meza paura de vegner ntel Brasil.

Adesso che semo ndrio far Festa da Fenavindima, bisogna recordarse de i taliani che i ze vegnisti e che i ga scuminsià tuto quel che gavemo incoi. Pori can, i ga proà de tuto par farse la vita. Ghen’è stà fameie che le ze vegneste intiere ntel Brasil. Ma ghen’è stà anca fameie che i vegnea un al colpo par proar e par veder se zera próprio tuto na cucagna come che i dizea. I primi tempi i ze stai più tristi, ma dopo, pimpianeto, tuto restea più fácile.
I conta che gnen’è stà un tal de Toni. Lera un giovanoto pena maridà, ma El gavea meza paura de vegner ntel Brasil. Alora el ga fato cossita: el ga mandà La so fémena, la Giosefina che la vegnesse insieme con gente cognossida, par veder se’l Brasil lera pròprio come che i contea. Ela la zera na talianeta bela, tipo la Leandra Leal de la novela Império.
Toni le restà in’Itàlia e ela la ze vegnesta. Ma quando che la Giosefina la ze rivada, i taliáni, quà ntel Brasil, i se gavea belche fato vanti un mùcio. San Paulo lera na cità belche granda, co’l tren elétrico e tuto. No lera mia come nte i primi tempi, quando i ze rivai i primi imigranti.
Cada due, trè stimane, la Giosefina la ghe mandea na carta a Toni par contarghe de i soldi che la zera ndrio guadagnar in San Paulo. Toni, intanto che la Giosefina la zera quà ntel Brasil, in’Itàlia el ga metesto su na fabricheta de braghete de fémene e el ga scuminssià ndar ben. De là un sei mesi che’l gavea metesto su sta fábrica, el ga pensa de ciamar in drio la so Giosefina che la ndesse giutarghe ntea fábrica. Alora el ghe ga scrito cossita: “Cara Giosefina, te pol tornar in drio, che quà in’Itàlia so’ndrio guadagnar na mùcia de soldi co la fábrica de Le braghete de fémene”.
Ma, la Giosefina la ghe ga rispondesto cossita: “Caro Toni, mi no torno mia pì in drio, parchè, son secura, che quà ntel Brasil, sensa braghete, son ndrio guadagnar de pì soldi che ti, la in’Itàlia, co la to fábrica”.
La se gavea catà fora un bel laoro próprio...