Coluna do dia 23 de janeiro

Quando che i ga tacà giugar futibol via pa e colònie, e che i ga scuminsià i campionati, el giugo de futibol el ga ciapà fogo dal bon. Se no i se copea, i se dea pugni, peade, garafae, bastonae... L’era um mestier de l’altro mondo.
Na doménega, ciò, giugava a capela San Gioani contra a capela San Valentin. El giugo l’era la via a San Valentin. Quili de San Gioani, che i savea che le saete le vegnea, i se gà portà drio spei e bastuni. La Marieta e la Dosolina le ze ndae insieme anca lore, parchè le gavea i so ómini che i giughea ntel time.
Pena scuminsià el giugo, quili de San Gioani i ga fato un golo. P’amor de Dio... La torsida de San Valentin la ze ndata rento ntel campo con rami de piante, matuni, spei, garafe, sassi... Tuto quel che i podea ciapar in man. Fin la Dosolina e la Marieta le se ga metesto in meso a la barufa. La Dosolina, pò, la ga fin ciapà na peada pena de soto del boton de a pansa.
Stimana drio, quili de San Gioani i ze ndai farghe parte a polìssia, par via che i gavea ciapae. Alora, el delegado el ga ciamà un par un, tuti quili che i gavea partissipà de a barufa. Anca la Dosolina la ze ndata, se ben che la gavea la pansa sgionfa de a peada che a gavea ciapà.
Alora, quando che la ze ndata rento nte a delegacia, el che’l delegado el ga visto che la se tegnea a pansa, parchè ghe fea mal par caminar, el ghe ga dimandà:
– Dona Dosolina, a senhora também participou da briga?
– Sim, dr. delegado, eu também estava drento daquela barufa...
– Quer dizer então que a senhora também foi atingida na encrenca?
– Non, dr. delegado, foi un poquinho mais pra cima da encrenca...