Quando che mi ndea al catessismo...

Quando che mi ndea al catessismo, go imparà na bela storieta sora la creasson del mondo.
Quando che’l Segnor l’era ndrio far el mondo, el ga ciamà là el mul e el ghe ga dito:
– Ti, mul, te tocarà laorar tuti i giorni a portar la gente in volta, e tirar a careta, e te magnarè pasto e capim seco, e dele volte, qualche panòcia de mìglio. E te viverè sessanta ani.
– Pa’mor de Dio, Segnor, sessanta ani i ze massa. Démene sol trenta.
E cossita el Segnor el ga fato. Dopo el ga ciamà là el can e el ghe ga parlà:
– Ti, can, te tocarà tender la casa, corer drio a le bèstie che scampa, e te magnarè i ossi che’l to paron el buta via. E te viverè vinti ani.
– Segnor benedeto – ghe ga respondesto el can – Tender a casa e magnar sol i ossi che’l me paron buta via, viver vinti ani i ze massa. Démene sol dieze.
E cossita el Segnor el ga fato. Dopo el ga ciamà là el macaco e el ghe ga dito:
– Ti, macaco, la to vita ze saltar su pae piante, de ramo in ramo par far rider la gente, e te viverè vinti ani. E te magnaré sol fruti de mato.
– Saltar su pae piante, far macacae, e magnar sol fruti de mato? Vinti ani i ze massa, Segnor, démene sol dieze.
E cossita el Segnor el ga fato. E, par última, el ga ciamà là l’omo e el ghe ga dito:
– Ti, omo, te tocarà comandar tuto el mondo, parchè te sì l’ùnico che ga inteligenza. Te viverè trenta ani.
– Segnor – ghe ga respondesto l’omo – Comandar tudo el mondo e viver sol trenta ani? I ze massa pochi. Démene i trenta ani che’l mul el ga mia volesto; i dieze che i ga vansà del cal e i dieze che’l macaco el ga mia volesto.
E cossita el Segnor el ga fato e el ghe ga parlà a l’omo:
– Alora, femo la to volontà, ghe ga dito el Segnor:
i primi trenta ani che mi te go dato, te viverè come omo;
dopo, de i trenta fin i sessanta, te viverè i trenta ani del mul: laorar par far su la to casa, pagar e conte dei fioi e i dèbiti dea fameia;
dopo de ciapi la posentadoria e dei sessanta fin i setanta, te viverè i dieze ani che te gh’è volesto del can: tender la casa e corer drio a le bèstie che scampa;
Dei setanta fin ai otanta, te viverè i dieze ani del macaco: far macacae par contentar i tosatei e i nipoti.
E cossita la ze la vita de l’omo: come che’l ghe ga dimandà al Segnor.