La Matilde la gavea de farse na consulta, par via che la gavea na mùcia de malatie de fémene.

La Matilde la gavea de farse na consulta, par via che la gavea na mùcia de malatie de fémene. Ma come che no la gavea gnanca un piano de salute, la ghe ga tocà de ndar consultarse ntel INSS, ma la gavea sentio dir che ghen’era un dotoreto gióvane, che lera tanto brao sora ste malatie.
El giorno vanti, la se ga tomà bagno polito, e a la matina bonora la ze ndata. Co la ze rivada là ntel INSS, ghen’era na fila grande de gente, che no la ga mia fato ora de ciapar la fissa pa consultarse.
El giorni drio, la ze levada su a le quatro de a matina, par esser la prima a ciapar la fissa. Co la ze rivada là ntel INSS, squasi che la casca in drio schena: no ghen’era pi fisse.
Alora la ga pensà: “Doman, fao diferente. Vui veder mi, se no vao esser la prima de tute.” La se ga tolto su na straponta, un cossin e la se ga butà davanti dea porta del INSS, e la ze stata là tuta a note. La par sinque dea matina, ga scuminsà rivar altre fémene, ma la Matilde la zera belche là impontelada davanti a porta.
A le oto, maisomeno, l’è rivà el dotoreto, e lo ga visto ndar rento, tuto in prèssia. È che, sto dotoreto, tute le matine, vanti de scuminsiar el so laoro, el gavea un controle cola so secretària. I fea el so programa, là sarai rento ntel consultório, e dopo scuminsiea a tender le fémene. Ma ga sucedesto, che giusto nte quel giorno, el dotoreto e la secretària i se ga passà via un pochetin dea ora, e quando che’l ga vardà ntel reloio, el ga visto che lera atrasà. Alora el se ga vestio tuto in pressa, ma el se ga desmentegà la botega verta. Quando che’l ga verto a porta, el ga parlà cossita:
– Quem é primeira?
Ústia, quando che la Matilde la ga visto el dotoreto là co la botega verta a dimandar “Quem é a primeira”, la Matilde la ga sol parlà cossita:
– Ah, segamo, maisomeno, tudas zunto...

*Ivo Gasparin