La Angelina la zera restada viuva, e el so omo el ghe gavea assà na bona popansa.

La Angelina la zera restada viuva, e el so omo el ghe gavea assà na bona popansa.
Quando el compare el ga savesto che la comare la gavea na mùcia de soldi ntel banco, e come che lu i ghe ocorea par comprarse nantra colónia, lè ndà dimandarghe in préstio de sti soldi. La comare la ghe ga imprestà tuto quel che la gavea ntea popansa, parchè el compare el ghe ga dito che i ghe ocorea sol par un sei mesi, fin che’l ciapesse i soldi de a ua, ntea comperativa, e dopo anca el ghe ga promesso un bel giùro.
Ció, passà i sei mesi, la comare la ze ndata dimadarghe i soldi. El compare el ghe ga dimandà che, pa mor de Dio, la spetesse nantri due mesi, che l’era ndrio far un bel negòssio, che alora si, l’era securo de pagarghe co el giùro e tuto.
Passà i due mesi, la comare la zera belche co le récie in piè. E tuti i giorni la ghe mandea dir, al compare, che la ghe ocorea sti soldi, e lu sempre el ghe respondea che la gavesse passiensa parchè el gavea un bon negòssio par far, e che el ghe pagaria un giùro ncora più alto.
Un giorno, a matina bonora, el compare l’era lá drio a strada che’l pissea su pa un baranco, e la comare la ga intivà, giusto, de rivar nte a ora. Quando la ga visto el compare, come che la gavea in mente l’in préstio dei soldi, no la se gà gnanca nicorto de cossa che’l compare l’era ndrio far, e la ghe ga dito:
Scolta quà, compare, saria mia belche ora de darme indrio i me soldi che te gò imprestà?
El compare, el se ga gnanca dato de conto che l’era ndrio pissar, el ga sol voltà a testa un pochetin, e el ghe ga respondensto:
– Varda, comare, se te gh’è un pochetina de passiensa de spetar nantri due mesi, parchè mi gò un bon negòssio in man, e che se la vien fora come che penso mi, guadagno ba mùcia de soldi, e el primo buso che stropo l’è el tuo.
Con quela, la comare la se a ga tolta a tuta a carera...