Ma sol robe sporcacione.

Ghen’è tante stòrie de papagai, ma questa la ga sucedesto dal bon.
Ghen’era, na volta, na veciota che la gavea na papagala che la savea dir sol robe sporche. Co rivea qualche dun ntela casa dela vècia, la papagala la scuminsiea dirghe su de tuto. Ma sol robe sporcacione. Ma, un, giorno, ze rivà là el vigàrio par benedir la casa e la papagala la gà scuminsià a dirghe su al vigàrio:
– Bruto vècio cáncaro, spusson! Veto onde co che le cótole longhe li? Gheto mia vergogna de ndar in volta vestio de che a maniera li?
Ciò, el vigàrio l’è restà fin fora dei sentimenti de scoltar la papagala a dirghe su de che a maniera li e el gà proà trarghe àqua benedia. Alora sì la papagala la ze deventada mata:
– Bruto vecion de un vecion! Vai trarghe àqua in sima a la to nona, bruto schifoso, slandron!
La parona dela papagala no la savea pì cossa far, e la ghe gà dimandà mila scuse al vigàrio. Alora el vigàrio el ghe gà dito cossita:
– Scolta quà: là ntela canónica mi gò due papagai che i ze católichi fervorosi. De tanto scoltar le preghiere in cesa, i dize su el rosário intiero tuti i giorni. Te pol rivar là in qualùnque ora, che i ze sempre ndrio dir su el rosário. Ncora doman, te ciapi la to papagala e te la porti là insieme co i me papagai. Mi ghe parècio na bela caseta anca par ela e la assemo là fin che la impara la dotrina.
E cossita i gà combinà. El vigàrio l’e ndà casa tuto contento, el gà mandà far na bela caseta par ricever la papagala, la gà pintada de bianca come par ricever na sposa pa i so papagai.
El giorno drio, come che i gavea combinà, la parona de la papagala la ze ndata portárghela al vigàrio. I due papagai i zera là che i dizea su el rosàrio, ma quando che i gà visto la papagala, i se gà fermà de colpo, e un el ghe ga dito a che altro:
– Gràssie a Dio! De tanti rosari che gavemo pregà, el Segnor el ne ga mandà na putana!