Sol e fémene le sà dir come che i ze i dolori del parto. Ghin’ò sentio tante fémene a dir che ghe volaria che i ómini i proesse, al manco na volta, sentir cossa che le ga passà par guadagnar i fioi, specialmente sti ani che no ghen’era mia el recurso dela cesariana.

Sol e fémene le sà dir come che i ze i dolori del parto. Ghin’ò sentio tante fémene a dir che ghe volaria che i ómini i proesse, al manco na volta, sentir cossa che le ga passà par guadagnar i fioi, specialmente sti ani che no ghen’era mia el recurso dela cesariana. Le ghe tochea far forsa fin che’l fioleto el vegnea fora.
Ma adesso, gràssie a Dio, go sentio dir che, in Cassia do Sul, un dotor el ga comprà na màchina che, nte a ora che la fémena la va guadagnar el fiol, sta máchina la pol passar na quantità de dolor al pupà del fioleto, se lu l’è de acordo, magari.
Alora, ga sucedesto che, sti giorni, na fémena quà de Flores da Cunha la ze ndata guadagnar el so fiol ntel l’ospedal dela Udimedi, e el dotor el ga volesto far la prima speriensa.
El dotor el ga ciamà là el marito, el ghe ga spiegà el funsionamento dela màchina e el ghe ga dimandà se lera de acordo e se no’l gavea mia paura.
– Nò, nò – el ghe ga dito el marito – Mi no go paura de delori, è... Se volì far la speriensa, la femo.
Alora el dotor el ghe ga dito che, come la zera la prima volta, scuminsiea a passarghe el dolor del parto dela fémena, com 10%, e dopo el podea aumentarghe el dolor, de acordo cola resistensa.
Dopo de diese minuti che i zera ndrio far el parto natural, el dotor el ghe ga dimandà al marito:
– Sito ndrio sentir qualche dolor?
– Nò, nò, dotor, podì aumentar de pi...
El dotor el ghe ga passà 30% del dolor dela fémena.
– E adesso?
– No sento gnente, dotor. Ma gnente pròpio.
– Alora el dotor el ghe ga passà 50%.
– E adesso, cossa séntito?
– Come se fusse gnente, dotor.
Ciò, el dotor lera ndrio restar fora dei sentimenti de veder che la màchina la zera bona pròpio. La fèmena la zera ndrio guadagnar el fiol sensa dolori. Sol che’l dotor lera preocupà parchè quando che i ghe ga vendesto la màchina, i ghe gavea racomandà che no’l passesse via dei 50% che lera pericoloso de copar el pupà del fioleto, ma come che’l ga visto che l’omo no’l sentia mia dolori, el ghe gà passa 70% e l’omo no’l sentia gnente.
Fin che el dotor el ghe ga passà 90%, 95%, e quando che’l ga fenio el parto el ghe gavea passà 100% dei dolori dela fèmena al so omo. L’è stá un vero sucesso. La fémena la ga guadagnà el fiol sensa dolori, e el so omo manco ncora. Sol che quando que i ze rivai casa, i ga catà el visigno morto, stirá davanti el portel. Alora si i ga visto chi che lera el pupà del fioleto.