Sti giorni in drio me gò catà c’ol prefeito, e lu el me gà contà che’l gà ...

Sti giorni in drio me gò catà c’ol prefeito, e lu el me gà contà che’l gà cognossesto un vigàrio la su a San Zosè do Oro, che quando che ndea via pa e colónie, tuto quel che’l vedea, el volea portarse casa: salami, formaio, galine, garafuni de vin, e delle volte anca, qualche porcheto. Ma un giorno, sto vigário el gà intivà de ndar te na casa de un talian de quei tirani, de quei che no i magna mia banane par no trar via la scorsa. No el gà gnanca fato ora de desmontar zò del zipe, el ghe gà dimandà sùbito che’l volea bever el vin de la bote. El talian, lora, lo gà menà zò in cantina, onde che ghe zera el vin del ciodo. Ma invesse de darghe un bicier pa che’l vigàrio el bevesse el vin, el ghe gà dato na scudela e un cuciaro. Come che’l vigário el gavea na grande voia de bever vin, el se gà gnanca fato maraveia; el gà ciapà el cuciaro e el gà tacà bever vin come che’l fusse ndrio magnar na bona menestra: una scuciarada drio l’altra, fin che’l gà dassà la scudela voda. E come che?l gavea meza prèssia de ndar casa, pena che’l gà fenio de bever el vin, l’è saltà su tel zipe e l’è ndà via. La fémena del talian, che la zera là ncora de boca verta a veder el vigário a bever de che a maniera li te la scudela, la ghe gà bravà el sol omo: - Ma che poco respeto che te ghè bio co’l padre! Parchè no darghe mia un bicier pa che’l bevesse el vin, poareto!? - Sito mata, fémena? Se ghe dao el bicier, te a ora che lu ndea bever el vin, el che’l voltea i òci in su e che’l vedea i salami, te sè che li portea via tutti... Pa sto colpo, el gà fato ora de salvar i salami...