Nela seconda domènega del mese de agosto, se fà la comemorassion del giorno dei pupà, el giorno che i fioi i manifesta tuta la sua afetività.

Nela seconda domènega del mese de agosto, se fà la comemorassion del giorno dei pupà, el giorno che i fioi i manifesta tuta la sua afetività.
Ma, vui dir che no i ze mia tuti i fioi che i ghe dà el valor che el se mèrita un pupà ntela fameia, parché, sti di indrio, go scoltà na fioleta che la ghe parlea ala so mama e la ghe dimandea cossita:
– Mama, mi go scoltà la professora che la ga dito che l`è stà el Signor che el ga fato el mar, le piante, el sol, la luna, le stele e che el ze stà Lu che el me ga creà anca mi. Zeo vero, mama?
– Si che ze vero, cara nina. El ze stà el Signor che el ga fato tuto el mondo e che el te ga fato anca ti.
– Vui saver anca se ze vero che el ze el Pupà Noel che el me porta i presenti quando riva el giorno de Nadal?
– Ma si, cara fioleta. Tuti i presenti che te guadagni de Nadal el è el Pupà Noel che i te li porta. E anca quando che riva la Pàscoa, el è el conìcio che el te porta i uvi de cicolata.
– Zeo vero, mama, che quando mi perdo un dente e che lo meto sora la finestra, la striga la vien portarme soldi?
– Ma si, cara, ze tuto vero.
– Mi volea dimandarve nantra roba, mama:
– Cossa vuto saver, adesso?
– La Nona la me ga dito che quando mi son nassesta, la ze stata na sicogna portarme qua casa. Zeo vero, mama?
– Si che ze vero, fiola. Un bel giorno de sol, na sicogna bela, bianca, la ga passà qua casa zolando. La gavea na sporta picada ntel beco e ti te zeri rento ntela sporta e ela la te ga assà qua ntela nostra fameia.
– Ma, alora, mama, el pupà sèrvelo pa far che qua casa?