Mi gó mai gognossesto un tiran che gnanca Bepi

Mi gó mai gognossesto un tiran che gnanca Bepi. Pa scumissiar, el gavea un fuca ano sessanta e lo tirea fora de’a garaze sol pròpio quando che ghe ocorea menar la so dona , la Pierina, a l’ospedal, parchè la zera sempre malada. Ma se par desgràssia la restesse malada nte un giorno de piova e che bisognea menarla al dotor, a ghe tochea ndar co’a lìnia, parchè lu no’l volea che’l so fuca el ciapesse la piova. Sto fuca, el restea anca sei mesi fermo nte’a garaze, insima de quatro tole, parchè Bepi el gavea paura que i penei i se smarsisse.
Par veder che tiran che l’era, un giorno el gavea un bel mùcio de legna par segar. Alora, el gà ciamà el so fioleto e el ghe gà dito:
­– Nini, va la zo de Luigi dimandarghe imprístio del segoto par segar la nostra legna, che deromai semo sensa.
Nini l’è ndà, e de la un pochetin el torna in drio sensa el segoto.
– Onde zelo el segoto? – Ghe gà dimandà el pai.
– Luigi el ga dito che oncoi no dà mia pa imprestar el segoto parchè el ghe ocore anca lu. Sol doman dopo meso giorno.
– Ben, ben, alora va su de Fioravante, che mi sò che lu el ga um segoto grando. Curi... móvete fora.
De la de na mesa ora, Nini el vien sensa el segoto nantra volta.
– Onde zelo el segoto, Nini?
– Fioravante el ga dito che’l so segoto el ga tuti due i màneghi spacai e no dà mia par segar legna.
– Sacranon de um sacranon! Sarà pròpio che oncoi ghe ze el diàgolo in torno? Ciapa a va là de a zia Filomena e dimándeghe se la me impresta el segoto grando.
Nini l’è ndato a tuta a carera, ma l’è tornà in drio sensa el segoto.
– A zia a ga dito che’l segoto grando l’è la zo de’l zio Fiorindo. Sol se volemo spetar fin la stimana che vien.
– Go dito mi che incoi el diágolo l’è molà... Alora fa cossita, Nini: va là in cantina, ciapa el segoto che ghe ze là, che oncoi seghemo a legna co’l nostro, gnanca che’l se frue un poco i denti.
Un tiran cossita, no ghi nò mai visto... No’l volea gnanca segar legna pa no guastar i denti del segoto...