No fea gnancora ùndese ani che Bepi l’era maridà e el gavea belche imucià nove fioi.

No fea gnancora ùndese ani che Bepi l’era maridà e el gavea belche imucià nove fioi. E con ùndese fioi, de le volte i passea anca fame, specialmente quando che’l tempo no’l laorea mia polito.
Un giorno, quando che Bepi el ga visto che i salami i zera fenii e che no’l savea pi come far par darghe de magnar a la fameia, l’è ndà robarghe un porco al visigno. Ma, a la domènega l’è ndà a messa e quando che l’è ndà confessarse che’l gavea robà el porco, el vigàrio el ghe ga dito che’l gavea de ciapar el porco e menàrghelo in drio, al visigno, se’l volea che’l ghe desse la assolvission.
– Ma, padre, ga parlà Bepi, sucede che noantri lo gavemo belche magnà e anca fato i salami...
– Ben, alora se a ze cossita, bisogna che te ghe daghe soldi, almanco, par pagarghe el porco.
– Ma mi go vergogna, adesso, de ndar là portarghe i soldi!
– Alora te fè cossita: domènega te vien confessarte nantra volta e te me porti i soldi che mi ghe i porto al to visigno, sensa dirghe chi che ze stà robarghe el porco.
– Ma quanti soldi, padre?
– Calcùlito quanti chili che’l pesea sto porco?
– Ah... Maisomeno setanta chili, parchè me ga tocà menarlo casa cola cariola.
– Ben, alora pòrteme quà cento e ciquanta reai, che mi cato che l’è ben pago.
Bepi l’è ndà casa co la conssiensa tranquila e domènega drio l’è ndà confessarse e portarghe i soldi al vigàrio.
– Sia lodato Gesù Cristo, padre. Son vegnesto portarve i soldi del porco.
– Te pol dàrmeli quà che sta stimana mi ghe i porto al to visigno.
El vigàrio el ga ciapà i soldi, li ga contai e el ghe ga dito a Bepi:
– Come cossita? Gaveino conbinà che el porco el valea cento e cinquanta cunti, e parchè che ti te me gh’è dato tresento cunti?
– È che mi go catà che gavì fato el prèssio massa barato del primo porco, e alora, sta stimana so’ndà là robàrghene nantro, che cossita el resta pago anca quel, padre...

*Ivo Gasparin