Adesso che somo drio sofrir par de questa maledeta malatia

Adesso che somo drio sofrir par de questa maledeta malatia, sti giorni, un el ga parlà cossita:
– Mi no gavaria mai pensà che vegnaria el giorno che guastaria de pì caciassa e spìrito co le man che co la boca.
Ma da che semo drio parlar de spìrito e caciassa, me go recordà che, na volta, nte na pìcola comunità,  ghen’era tanti ciuchetuni. Alora el vigàrio el ga pensà de ciamar un dotor foresto che’l vegnesse farghe na conferensa  par veder se lera bon de méterli a posto.  
A la doménega vanti, el ga parlà  in ciesa,  che sabo de note i ndesse tuti ntel salon parochial,  che gavea de vegner  un dotor foresto a parlar de robe importantìssime sora le fameie. El ghe ga recomandà che no ghe manchesse gnanca un, specialmente i òmeni, parchè se ghe  manchesse qualche dun, quando che’l moria, no ndea gnanca  farghe l’intero.
Co ze rivà sabo de note, i zera tuti là ntel salon. 
El dotor el ga fato na vera prèdica. El ga parlà dele maledission che porta la caciassa, i malefíssii, le barufe rento de casa par via de quel maledeto vìssio, e el ghin’à anca dontà un pochetin de più, come che’1 vigário el ghe gavea racomandá. E, par fenirla, e anca pa assar la gente coi oci grossi, el ga ciapà due bicieri:  un pien de àqua, e che altro pien de spìrito. Dopo el ga ciapà due mignoche vive. Una,  la ga trata rento ntel bicier de l’àqua:  la mignoca la se movea come se fusse gnente. Che altra, la ga trata rento ntel bicier de spìrito:  la ga fato due, tre sallti e la ze restada morta. Alora el dotor el ga ciamà Bepi e el ghe ga  dimandà:
– Bepi, te ghè visto che a mignoca che go trato rento ntel l’àqua la ze restada viva, e che altra, che la go trata   rento nte lo spìrito,  la ze restada morta. Alora, dime,  Bepi, che conclusion gheto tirà?
– Ah, dotor, mi zera qua drio parlar con Toni, che se a caciassa la copa le mignoche, la ze bona anca par copar zo i vermi. E cossita no ocorre gnanca guastar soldi par comprar la vermetina.