Te sè che cada sinque, sei ani, el véscovo scàmbia i vigari dele paròchie. Alora, gà sucedesto che un prete doveneto, pena rivà ntela so paróchia, par far un laoro ben fato, el volea saver tuto come che lera la vita de la comunità nova onde che ndea laorar.

Te sè che cada sinque, sei ani, el véscovo scàmbia i vigari dele paròchie. Alora, gà sucedesto che un prete doveneto, pena rivà ntela so paróchia, par far un laoro ben fato, el volea saver tuto come che lera la vita de la comunità nova onde che ndea laorar. Ntel primo mese, tuti i giorni lu ndea in volta per la cità, par saver de la vita e de i costumi de la gente. El volea saver la vita de cada un de i so parochiani: se i zera maridai, se i zera solteri, quanti fioi che i gavea e così vanti.
Um giorno el gà catà la Florinda. Parla quà, parla là, e ela la ghe gà contà che fea sol due mesi che la zera restada viúva.
– Maria Santa, – ghe dize el vigàrio, – Gióvana cossita e belche viuva!?
– Si, padre, gò perso el me omo con pena trenta ani! Fea sol quatro ani che iérimo maridai.
– E quanto ani el gavea lù?
– Trenta trè, padre, la età del Segnor.
– Maria Santíssima! Ma morir gióveno cossita! Fin pecà! Ma cossa zê che lu El gavea?
– Ah, padre, el gavea sol mesa colònia, poro can anca lu.
Nantro giorno, sto padre el vede na bela tosa ndrio menar na vaca par na corda. Lora el ghe gà dimandà:
– Sito ndrio ndar onde co’sta vaca?
– So’ndrio menarla là del visigno par far na cruza co’l toro.
– Ma fiola de Dio, – ghe ga dito el vigarieto novo – Questo el saria un laoro par to pare.
– Un laoro pa’l me pupà, Padre? Mi cato che nò, parchè noantri sempre gavemo menà la vaca nel toro del visigno, e ga sempre dato giusto.
El vigarieto no lera bon de farse capir...