Che altra volta gavemo contà la stòria dei corbi, che quando che zèrimo ndrio vardar rento pa’l buso dea vaca morta, ghe ze saltà fora trè corbi, batendo le ale, e semo restai tuti sporchi.

Che altra volta gavemo contà la stòria dei corbi, che quando che zèrimo ndrio vardar rento pa’l buso dea vaca morta, ghe ze saltà fora trè corbi, batendo le ale, e semo restai tuti sporchi. Che gaveino lavà le robe nte un rieto e che, quando che zèrimo là ndrio spetar che le se sechesse, la mama la gà ozà:
– Zaime, vien su presto, che’l pai el gà de bisogno che te vegni iutarlo!
Alora, quando che son ndà su insieme coi mei amici, el pai el zera là che smissiea na àqua tùrbia rento nte un baldon.
– Sio ndrio far chè, pai? – ghe gò dimandà?
– Ah, so’ndrio far un remèdio pa’l mul, che’l se gà imbugà, e l’è la su in colónia, butà zo, e bisogna che vegnì iutarme.
So’n restà anca contento, che’l pai el me ga gnanca bravà parchè el ga mia visto Che zérimo co le robe tute moie.
Dopo che’l ga fenio de pariciar el remèdio, lo ga tranto rento ntea pompa de darghe su verdarame ae vigne, el ga metesto a pompa ntea schena e semo ndai su, mi, el pupà, e nantri quatro amici mei. Quando semo rivai, el mul el zera là butà zo, co la Pansa sgionfa che gnanca un balon. El pai el ga metesto a pompa in tera e el ga parlà cossita:
– Valtri quatro, bisogna che tegnì el mul, un par cada gamba. Ma vardì de tegner bem forte, è! E ti, Zaime, quando che mi meto a caneta rento pa’l buso del mul, ti te pumpi pimpianeto.
Quando che’l ga impirà a caneta nte’l buso del mul, el ga dito:
– Adesso scumìssia pompar, Zaime.
E mi, che zera là tuto spaurà, coi oci fora dea testa, invesse de pompar pimpianeto, go scumissià a pompar con tuta a forsa che podea. Robe de gnanca creder! El mul el ga trato in drio, e ze vegnesto fora un pissaroto come quando che i verde el cocon dea bote, e el me ga lavà de in sima a in fondo. E cossita go ciapà la seconda smerdada nte’l medèsimo giorno: a prima dei corbi, e la seconda, del mul.
Ma de là un pochetin, ciò, el mul l’è levà su e el ga scumissià a caminar. Gràssie a la medissina veterinária del me pupà. Altro che i veterinári de incoi, si...