L’era na domènega dopo meso giorno, e ghen’era el giugo del time del Curuzu contra El time de Leonel, e i zera ndrio giugar ntel campo del Curuzu.

L’era na domènega dopo meso giorno, e ghen’era el giugo del time del Curuzu contra El time de Leonel, e i zera ndrio giugar ntel campo del Curuzu. L’era un bel campo, co’na bela grama e diversi ocaliti in torno, ma via pa stimana, el campo el servia de potrero pa e vache e anca pa i porchi.
El time de Leonel l’era ndrio guadagnar de un a zero. E se’l time del Curuzu el perdesse a partida, el caschea fora del campionato. Quando che ghe manchea sinque minuti, ga sucedesto un scanteio pa’l Curuzu. Alora, el giugador più reforssà del time, el ga ciapà a bola e el ga dito:
– Asseme che vao mi cobrar questo corner.
El ga postà ben a bola e el ga pensà intrà de lu: “Ghe dao na peada con tuta la forsa, che se ghe ciapo ben e che la peta in qualche dun, l’è capace che la vae rento”.
L’è ndà in drio cul, trè, quatro metri, el ga impienio i palmuni, sarà i oci e el se ga invià con tuta la forsa che’l podea. Ma pròpio ntea ora, ga passà un porco davanti, e invesse de sutar a bola el ga sutà el porco. Ga dato un bruto de un scioco, e lu l’è caisto in drio schena cola gamba spacada in due tochi. Dea fin par veder i ossi dele canele che i saltea fora. El ga perso i sensi, e l’è ndà desmissiarse sol el giorno drio ntel l’ospedal.
Quando che’l se ga desmissià, ghen’era el presidente del time li darente e lu el ghe ga dimandà:
– Cossa galo sucedesto?
– Te recòrdito mia che te zeri ndrio giugar a bola?
– Si che me recordo, che ièrimo ndrio perder el giugo de un a zero!
– E te recòrdito mia che si ndà cobrar el corner?
– Si che me recordo!
– Alora, invesse de sutar a bola, te gh’è sutà un porco e te gh’è spacà la gamba in due tochi.
– Ah, porco de um cane, anca quela la me gà sucedesto? E adesso, come fao laorar drio le vigne cola gamba spacada?
– Ma no stà gnanca lamentarte, caro. Se te vedessi come che l’è ciapà quel che ga dato la testada ntel porco!... L’è là ntela UTI ndrio morir co’l col stravoltà.
– E galo fato el golo?
– Si che’l ga fato el golo. Fenio el giugo, un a un e semo mia caisti fora del campionato.
– Gràssie a Dio!

*Ivo Gasparin