Cada due, trè quadre, te vidi na cesa nova, ma nò na cesa católica, le ze cese de altre relision

Sti ani in drio, quà in Flores da Cunha ghen’era sol na relision, la relision católica, ma el giorno de incoi, i me ga dito che ghin’è de pì de vinti. Cada due, trè quadre, te vidi na cesa nova, ma nò na cesa católica, le ze cese de altre relision. Ghe ze de la Sembléia de Dio, de i Protestanti, de i Vangélichi, e no só gnanca el nome de altre che ghin’è. Ma ghe ze anca quei che i ze ndrio spetar che’l Segnor el vegne al mondo nantra volta.
Alora, gò savesto che, de acordo con quela relision lì, el Segnor l’e ritornà dal bon, ma, pa no farse de cognosser, el se gà vestio de dotor e l’è ndà ntel Posto de la Salute a tender i malai. Quando che l’è passà ntela saligna de spera, tuti i se gà rimirà parchè i gà visto che lera un dotoreto novo. Ma i gà pensà che La prefeitura la gavea contratà nantro dotor, parchè no i zera mia contenti co’l dotor che laorea lì. E, par na coinsidensa, el primo passiente lera un omeneto paraplézico, e l’è rivà là co la so carega de rodete. El Segnor lo ga sol vardà, e El ghe gà dito:
– Lévate sù e và via.
El omeneto, el se ga indrissà le gambe, l’è saltà sù in piè, el ga ciapà la so caregheta e l’è ndà via caminando. Quando che l’è rivà là ntela saligna de spera, tuti i ghe dimandea:
– Come zelo el dotoreto novo?
L’omeneto l’è ndà fora pa’a porta urtando la so garegheta e el ghe gà rispondesto cossita:
– No stè aver tanta speransa. El dotoreto novo l’è come quel che gavemo quà: el me gà sol dato vardada e el me ga mandà via...
Te vidi come che la ze: ntel Posto de la Salute, gnanca el Segnor no’l contenta i malai...