Par quela che sò mi, tuti i coloni i gà ràbia dei fiscai. Mi cato che de cento coloni, ghen’è un che’l ghe piase dei fiscai, e de duzento, gnanca un.

Par quela che sò mi, tuti i coloni i gà ràbia dei fiscai. Mi cato che de cento coloni, ghen’è un che’l ghe piase dei fiscai, e de duzento, gnanca un.
Alora, ghen’è stà na volta, un fiscal che l’è rivà ntela casa de un colono che’l gavea na pícola criasson de vache. El fiscal l’è rivà là tuto pien de spròsie:
– Mi son el fiscal del governo e son vegnesto quà par far la fiscalizasson dele vache, par veder se no ghe ze qualche irregularità. Pa veder se te si ndrio far el laoro de acordo co la lege.
– No ghe ze poblema gnanca um – el ghe gà dito el colono – Sol che no te pol mia ndar rento nte quel potrero là via in fondo.
– Cossa che te me dizi? Che no posso mia ndar rento nte quel potrero là via? Mi vao rento onde che vui. O pénsito che mi sìpie chè?
Mi son el fiscal del governo, gheto capio?
– Gò capio, si. Fà quel che te vol ti. Mi sol te gò dito che no te vae rento nte quel potrero, sol quela...
– Te gò belche dito che vao rento onde che vui mi. E se no te me credi mia, varda quà el crachá de fiscal. Questo crachá el me dà la autorità de far quel che me pare.
– Gò capio, si. Sol te digo nantra volta: te pol ndar onde che te vol ti, ma no stà mia ndar rento nte quel potrero lì.
– Gò belche visto che me toca sfregarte el crachá ntela fàcia par veder se te me capissi de na volta.
Con quela, el colono el gà sbassà zò la testa e el fiscal el se gà invià a passi larghi, drito là via ntel potrero, parchè el desconfiea che là nte quel potrero ghe fusse qualche vaca co la fetosa.
De là de un sinque minuti, el colono scolta un bordel del demónio, e el vede El toro ndrio córeghe drio al fiscal. El fiscal robe che’l perde fin i stivai de tanto corer. Ma ncora ben che lera sguelto e el gà fato ora de rampegar su pa pianta de sinamon, vanti che’l toro lo ciapesse. El fiscal in sima la pianta e el toro soto, che sfrassea in tera e scornea su par la pianta. Alora el fiscal el ghe gà osà al colono:
– Ciò, compagnero, vien iutarme! Fao chè, adesso par parar via el toro?
– Móstreghe el crachá, par veder se el toro el sà leder...