Quando na persona la se mete far su qualque laoro, sempre ghen è qualche dun che vai là impienirghe le récie

Quando na persona la se mete far su qualque laoro, sempre ghen è qualche dun che vai là impienirghe le récie. Se el ze drio pintar la casa de verdo, par esémpio, riva là un e el ghe disse:
– Èh, ma se la te pintassi de bianco la combinaria meio cole finestre.
Riva là nantro:
– Se fusse mi ntel to posto, la pintaria de gialdo.
Se un el ze drio far su un staloto pai i porchi:
– Se te fessi el staloto la zo darente el rieto,  saria pi cómodo par darghe àqua ai porchi.
E nantro:
– Parché che no ghè mia fato el staloto là darenre el orto, che alora la grassa dei porchi la cascaria darente le verdure?!
Alora, ghen era un drio far su un forno. El giorno drio che el gavea finio el laoro, la so fémena la ze rivada là e la ghe ga dito:
– Ciò, negro, pénsito che mi vae far pan ntel quel forno lì?
– Parché,cossa ghe zeo de sbalià?
– Te vidi mia che te ghè fato el forno cola boca voltada banda a rua?
– Si, cossa vol dir?
– Vol dir che quando mi son drio meter el pan rento ntel forno o drio tirar fora le bronse, me toca sbassarme zo e gheto gusto che tuti i vede le me culate? Se te vol che mi fae pan, te pol trarlo zo e farlo col cul voltà banda a rua.
El omo al ga trato zo el forno e lo ga fato come la dona la ghe ga gavea comandà. Pena che el gavea finio, el so visigno l`è passà là e quando che el ga visto el forno no’l se ga mia tegnesto:
– Sito stà ti far el forno?
– Si che son stà mi, parché?
– Gheto mai visto come che el Joan de Baro el fà el gnaro? Sempre cola boca voltada par la banda contrària de onde vien la piova, alora no piove mai rento ntel gnaro. E ti te ghè fato el forno cola boca voltada pròpio par la banda da piova. Te vedarè che tute le volte che piove, la te impienisse el forno de àqua.
Ben, alora el ga trato zo el forno par la seconda volta e ga fato cossita:
El ga impiantà in tera un palanco ben groso, e sora sto palanco el ga fato un soaio de taole con una broca de fero in meso par poder pararlo torno e sora sto soaio, un piano de motoni. 
Dopo, el ga ciapà e el ga construio el forno sora sto piano de matoni. Alora, tute ler volte che qualche dun ndea là darghe la idea de che banda che el cataria che el forno el gavaria de star cola boca voltada, lu el parea torno el forno e cossita nissun mai el ghe ga impienio le balote.