Lera belche un paro de mesi che Nani el gavea na pìcola desconfiansa de che la so fémena la zera ndrio tradirlo.

Lera belche un paro de mesi che Nani el gavea na pìcola desconfiansa de che la so fémena la zera ndrio tradirlo. I so amici i zera sempre ndrio dirghe che stesse su co le rècie, che intanto che lu ndea laorar te a fàbrica, la so fémena la recevea na vìsita strània, e che deromai i corni i zera ndrio spuntarghe te a testa. Dopo de pensarghe sora un bel toco, un giorno, Nani el gà fato finta de ndar laorar e el se gà sconto drio el muro par farghe a varda. De là de na mesa ora el gà visto co i so òci che tuto quel che i so amici i ghe dizea, lera la pura verità. Ma squasi che’l casca ndrio schena, quando che’l gà visto che l’amante de la so dona lera el so compare de casamento. Ben, lo gà assà che ndesse rento, e pimpianeto l’è ndà torse el rivolve par coparlo. Ma intanto che lera ndrio meter su le bale tel rivolve, el gà scumissià pensar intrà de lu: “Ma sarà che so’ndrio far la roba giusta? Parchè se fusse de pensarghe sora, dopo che la fémena la se gà catà fora sto amante, no la me gà pi dimandà soldi par far gnente; e varda che la se gà comprà scarpe nove, due vestiti nuvi, un relòio, e ncora la se gà metesto su i denti de oro, e no gò guastà gnanca un fiorin. E adesso se vao là e ghe dao un tiro, se fenisse tuta la cucagna. E lora, se fusse de pensarghe sora, ze meio assar come che la zè, parchè, pensando polito, el corno l’è lu, che’l paga tute le despese de a fémena e, de note, chi che dorme com ela son mi. Ben pensada: el corno l’è lu...nò mi...Assa che i se la gode, porco cane...