Stimana passada, la ze stata la stimana del Rodeio. Lá, ghen’era de tuto, pó: surasco, bira, bombace, stivai, lassade, ciuchetuni, gaite, violuni e putane a volontà.

Stimana passada, la ze stata la stimana del Rodeio. Lá, ghen’era de tuto, pó: surasco, bira, bombace, stivai, lassade, ciuchetuni, gaite, violuni e putane a volontà. Ma mi son stà rimirà de veder come che tanti i ghe vol ben al caval. Mi cato che i ghe vol de pi ben al so caval, che la so dona.
Alora, me recordà de na stòria, che la gà sucedesto sti ani in drio.
Un gaúcho, de quei próprio de la radiza, el gà infornio el so caval e l’è ndá parlar co’l vigário. Sto gaúcho l’era un de quei che iutea tanto la ciesa. Quando sucedea qualche festa, lu el ghe dea de presente, al vigàrio, una vaca, o un boi, o na piégora. Ciò, quando che’l vigàrio lo gà visto, l’è restà tuto contento.
– Sia lodato Gesù Cristo, padre!
– Sempre sia lodato!
– Incoi, padre, son vegnesto quà par batesar el me caval, parchè vui che’l me caval el sìpie un cristian, anca lu, che quando che’l more, vui che’l vae drito in paradiso
El padre el se gà metesto e man ntea testa e el gà sclamà:
– Batesar el to caval? Ma gnanca parlar, caro! Mi só che ti te iúti tanto la ciesa, ma se bateso el to caval, e se’l Papa el vien saverla, el me scomunga mi e anca ti.
– Ben, ben... se no dà mia par batesarlo, far chè? Fin pecà, padre, parchè mi gavea calculà che, par batesar el caval, me tocaria pagar in torno de diese mila cunti. Ma, se no dá mia, femo de manco...
Ciò, quando che’l vigário el gà sentio che’l gaúcho l’era disposto a pagar diese mila cunti, el gà pensà intrà de lu: che se ciave anca el Papa, sta volta, e el ghe gà dito al gaúcho:
– Calma, calma, mi cato che, pensando ben, batesar un caval no l’è mia na roba de l’altro mondo, nò. Quando che Noè el gà metesto tute le bèstie rento ntea Arca, le gà batesae tute quante. Alora, batesemo anca el to caval, e pronto.
Dopo che’l vigàrio el gà batesesto el caval, el gaúcho el ghe gà dato i diese mila cunti, l’è montà su tuto contento, e quando che’l se gà invià pa ndar casa, el vigàrio el ghe gà racomandà:
– No stà mia desmentegarte, che el mese che vien, bisogna farghe la crésema, se te vol che’l to caval el sìpie un vero cristian.