El vigário de na pìcola comunità,...

El vigário de na pìcola comunità, el gà seità squasi due ani a parlar, nte le prèdiche, sora i malefissi de la caciassa. El gà seità tanto, che deromai ghen’era solo due, trè de quei che no i volea savérghene de assar là de bever. E un de quei, l’era Gioanin.
Alora, na doménega, el vigário el se ga catà co Gionin, e el ga tacà parlarghe sora tute le desgràssie che vien de la caciassa: che la fa mal par la salute; che un omo ciuco el deventa un paiasso davanti la società; che la porta la disunion de la fameia... che la fa questo, che la fa quel... e vardando ben in te la fàcia de Gionin, el vigário el ghe gà predicà bel alto:
– E ti, Gioanin, cossa me dìzito, no saria mia ora de fenir co la caciassa?
– Mi saria anca de acordo, padre, ma par fenir co la caciassa no l’è mia fàcile come che dizì vu, nò. Mi, so’ndrio far la me parte parchè ghi’n bevo un meso garafon al giorno, ma ghe volaria de pi gente che me giutasse.
Quando che’l vigário el ga visto cossita, el gà proà parlar de nantra maniera par veder se Gionin lo capia e el ghe gà dito:
– No l’è mia come che te si ndrio pensarghe sora, Gioanin. Ghe’to imparà ntel catessismo le parole de Gesù, le parole de Cristo?
– Cristo son mi! – ghe ga respondesto Gioanin.
– Che bestema sito ndrio dir, Gioanin?
– So’ndrio dir che mi son Cristo, padre... Se vegnì insieme co’mi, vedarè che so’ndrio parlar la verità.
El vigário, ciò, el ga pensà che Gioanin l’era ndrio deventar mato, ma par via de le dùbie el ga pensà de farghe compagnia par veder cossa che vegnea fora.
Alora, Gionin el ga menà el vigário là nte la bodega onde che ndea sempre bever. Quando che i ze ndai rento nte’a bodega, el bodeghero l’era incucià zo drio el balcon, e quando che’l gà scoltà che ghen’era gente, el se gà levà su, e quando che’l ga visto Gioanin, el ga sol parlà cosita:
– Sito quà nantra volta, cristo de un cristo!?
Alora el vigário el ga visto che Gioanin l’era ndrio parlar la verità. L’era un cristo dal bon... e de quei tristi, par sora...