Sti ani in drio ghen’era tanta gente che fumea, tanto de pì del giorno de incoi. No ghen’era mia tante propagande che parlea del perìloco del fumo. I tosati i scominsiea bonora co’l sìgaro, i ghe parea che quili che no i fumea mia, no i zera mia òmini.

Sti ani in drio ghen’era tanta gente che fumea, tanto de pì del giorno de incoi. No ghen’era mia tante propagande che parlea del perìloco del fumo. I tosati i scominsiea bonora co’l sìgaro, i ghe parea che quili che no i fumea mia, no i zera mia òmini.
Alora, la Clarisse Morandi la me ga contà una de bona, sora sto assunto.
Questa stòria la ghe ga sucedesto al so cugnà, Valderez dos Santos. La ga dito che i zera in trè fradei. Quando che i ndea in colónia scavessar mílio, i tirea fora el pel dea panòcia del mílio, i fea su un piroloto, i ciapea la meio paia, i se fea su bei saruti e i tachea fumar. Quando che so pare el ga visto cossita, el ga sentio el perìcolo che i fioi i ciapesse el vìssio de fumar, e el ga pensà na maniera de desvissiarli súbito, e el ghe ga dito:
– Go belche visto che valtri no savì mia far sìgari. I sìgari che si ndrio far co’l pel de mìlio, i beca massa la léngoa. Mi ve insegno na maniera che go imparà del me nono quando che l’è vegnesto d’Itàlia.
Vardè, pa che’l sígaro el gàpie pròprio el gusto del fumo, bisogna far cossita: ndè là ntel potrero, ciapì le boasse de vaca, più seche che le zè, più gusto le gà. Bisogna méterle che l’è se seche al sol, e quando che l’è ben seche, che le se sfarina che gnanca el fumo, le resta pronte par far i sígari.
Ciò, i tosati, i ze restai contenti de scoltar la ensegnansa de so pare e i ga fato tuto come che’l ghe gavea spiegà. Dopo che i gavea prontà i sìgari, i ze ndai mostràrgheli a so pare, e lu el ghe ga dito cossita:
– Ma che bei sìgari che gavì fato! Gnanca mi no ghin’ò mai fato de bei cossita. Sta note, dopo dea sena, vui proárghene un anca mi.
Alora, dopo che i ga senà, i ze ndai sentarse là fora ntei scalini dea cosina, insieme co so pare, che’l ga fato finta de fumar anca lu, e i ga tacà fumar sti saruti fati de boassa seca. Dopo de trè, quatro tirae, i ga scuminsià sentirse mal, a gomitar, robe che i crepe.
E de quell giorno in vanti, no i ga pì volesto de savérghene de sígari
Se no ghe credè mia, dimandeghe a Valderez dos Santos, che la ze stata la Clarisse a contarme questa stòria...

*Ivo Gasparin