- Ma comare, sito quà anca ti?

- Ma comare, sito quà anca ti?
- Siiii... son quà che speto l’ònibus, ma me toca ndar sentarme, che me fà mal a gamba che mai. Quando che’l tempo l’è mezo de piova cossita, robe de morir de tanto mal che me fà.
- Ma ndemo sentarse là de a sorveteria che intanto che ciacolemo, ciucemo um picolé.
- Ma o ciucemo próprio, comare, parche, onde che se gà visto un caldo compagno in zúlio.
- È...el tempo l’è tuto roverso anca lu. Ma anca, con tute che le potaciarie che i mola par’ària. E dopo te ghè visto tel televison, el petrólio che gà storà soto el mar? Mi cato che’l Senhor l’è belche stufo anca lu. No sò onde che ndemo fermarse...
- So’ndata consultarme co’l dotor Bolzoni e portarghe là i ezami e el gà catà che gò i trigridi un pochetin massa alti, e alora el me gà dato diversi remedi e anca el me gà dito che bisogna ténderme de no magnar massa roba gorda..
- È... dopo de veci, ghe vol consultarse e far i ezami manco na volta a l’ano. Ncora ben che mi e el me omo semo associai ntel Cristo Operário, che alora le consulte le vien fora squasi par gnente.
- Mi, gràcie a Dio gò el me omo che lu el paga la Udimedi, alora mi resto soto lu, nò. Parche el dotore al gà catà che lu el gà a bubina massa alta e el che’l ghe toca consultarse, manco cada trè mesi. Alora, se no ghe fusse la Udimedi, cara da Dio, no ghe saria soldi che i bastesse.
- Ncora ben che’l giorno de oncoi che ze tute le comodità, parche i nostri noni, poareti, no i gavea gnanca l’ospedal, pori can. Tante volte i moria de a penissita e i dizea che i moria de mal de pansa.
- Ciò, comare, varda che l’ònibus l’è belche ndrio rivar. Ze meio che se femo sguelte par ciapar un banco par sentarse.
- Alora, và vanti ti ciapar un posto, che intanto mi vao pagar i picolé, che dopo se la contemo...