Quando che ndea ncora tel secondo libro, me recordo che la professora la contea bele storiete. E un giorno la ghi nà contà una de bela; no sò se la savì.

Quando che ndea ncora tel secondo libro, me recordo che la professora la contea bele storiete. E un giorno la ghi nà contà una de bela; no sò se la savì. La gà dito che, na volta, ghe nera un fazendero che l’è ndà te un leilon de cavai e el se gà comprà el meio caval che ghe zera li. Tuto contento, el se gà menà el caval casa. Ma, el giorno drio, a la matina bonora, el gà catà el caval là butà zò, intrigà fin de mover le gambe. El gà mandà ciamar súbito el veterinàrio, che lo gà zaminà, palpà dar par tuto, fato tuti i ezàmi che ghe ocorea e el ghe gà dito al paron: - Che’l caval quà, pal zeito, el gà na malatia cativa. Se de quà trè giorno l’è ncora butà, tocarà coparlo. Ma doman, vegno veder come che l’è ciapà. Pena che’l veterinàrio l’è ndà via, el porco, che lera là de na banda ndrio scoltar, el ghe gà dito al caval: - Ciò, amico, fà forsa... leva sù... Se te resti là butà, te ghè sentio che i gà dito che i te copa... Leva sù... ndemo...fà forsa, compagnero... El caval no’l se gà gnanca movesto. El giorno drio, el veteriràrio lo gà catà ncora là butà. El gà ciamà el paron el el ghe gà dito: - Doman vegno quà nantra volta; se’l caval l’è ncora cossita, bisogna coparlo, parchè l’è ndrio patir massa. Pena che’l veterinàrio el gà voltà a schena, el porco el gà seità: - Gheto sentio cossa che’l gà dito el veterinàrio? Ndemo, ciò... fà forsa... leva sù... Se te rèsti li butà cossita, doman i te copa... Leva sù... ndemo... fà forsa, caval... De note, el caval el gà tolto tute le forse che’l podea, e el se gà levà sù e, a la matina bonora, quando che’l veterinàrio l’è arivà, el caval lera là che’l corea via pal potrero. Quando che’l paron el gà visto el so caval che’l corea, el gà ciamà el veterinàrio e el ghe gà dito: - Gracie a Dio el caval el gà guario... Copemo el porco e femo na festa... Che ciavada pal porco...