Bepin el se gà maridà un pochetin vècio.

Bepin el se gà maridà un pochetin vècio. El gavea belche trenta sete ani, ma forsa de ndar in cerca el se gà catà fora na fémena, mesa gorda, magari, ma squasi massa bona par lu: la savea far de tuto rento de casa. Dopo de um paro de mesi che i zera maridai, la fémena la gà scumissià a vegner sempre piu gorda, sempre piu sgionfa. Bepin, sempre de pi contento parchè el gà sempre bio voia de aver arquanti fioi. L’era securo che la so fémena la zera ndrio spetar. Te sè che ne quel tempo no l’era mia come oncoi che le fémene gràvide le fà l’acompagnamento co’l dotore de mese in mese.
Ciò, dopo de passai nove mesi, Bepin la gà menada te l’ospedal parchè parea che zera rivada la ora, parchè la fémena la gavea la pansa sgionfa robe che a crepesse. El dotore la gà zaminà, la gà zaminà, la gà palpada da par tuto e l’è rivà a la conclusion che la fèmena no la zera mia gràvida, ma che la gavea la pansa piena de vento. Quando che i so amighi i gà savesto, i gà scumissià ciamarlo de Bepin de Vento... Bebin de Vento par de quà... Bepin de Vento par de là, e Bepin el restea cativo che gnanca un can rabioso. El gà fato tante de che’e barufe che’l delegado lo gà fato ciamar diverse volte te a Delegacia, parchè Bepin endea sempre in volta c’un baston in man. E un giorno, quando che un tosato lo gà ciamà de Bepin de Vento, Bepin el ghe gà dato due bastonade te a testa, robe che lo cope. Lora el Delegado lo gà ciamà là e el ghe gà dito:
- Varda, Bepin, se te contínii a barufar cossita, me toca méterte in prison. Ma scolta quà, che mi te digo sol na roba: quando che i te ciama de Bepin de Vento, fà de conta che no sìpie gnente e te vedarè che a gente i se stufa e i se ferma de coionarte.
Bepin el gà catà che’l Delegado el gavea anca razon e el gà acetà a preposta. Ma pena che l’è ndà fora de a Delegacia, el delegado el gà scoltà un osamento che mai. L’è ndà veder cossa che zera ndrio suceder, e el gà visto Bepin ndrio darghe bote a un tosato, robe que lo cope de tante bastonade. El Delegado l’è coresto lá e el ghè gà dito a Bepin:
- Te gó mia dito che no zera par barufar quando che i te ciama de Bepin de Vento?
- Che i me ciame de Bepin de Vento, mi no m’incomodo, ma dimandarme imprístio el me “sifoloto” pa impienir i penei de a bissicreta? ... questa nò...
È... se la fusse cossita, el podaria ndar laorar te na borassaria a sgionfar penei.