Quando Bèpi el se cata con Tòni, i ze sempre ndrio parlar de le so done: o parchè l’è ze massa cative, o parchè l’è guasta massa quando che l’è và te a loza, o parchè l’è ze sempre in volta... In suma, i ze sempre ndrio sbrontolar.

Quando Bèpi el se cata con Tòni, i ze sempre ndrio parlar de le so done: o parchè l’è ze massa cative, o parchè l’è guasta massa quando che l’è và te a loza, o parchè l’è ze sempre in volta... In suma, i ze sempre ndrio sbrontolar. Un giorno, Tóni el gà visto che Bèpi no lera mia tanto de acordo: rabioso che gnanca un can. - Cossa gheto, Bèpi, che te si cativo de che a maniera li? - Sta gnanca parlarme che oncoi son fora de i sentimenti. Sti giorni, te gò parlà che mi e la me dona no ièrimo mia ndrio ndar tanto de acordo, parche no vui che la vae te la loza e la me guaste fora tuta la economia che gavemo fato fin adesso. No la ze mai fenia: un giorno ghe vol comprar roba par far nissiui; nantro giorno ghe vol na pignata nova; nantro colpo la vol comprarse un vestito, un paro de scarpe, nantro recin, nantro pó-da-ros, e cosi vanti. - Ma le done l’è ze tute compagne, pó... - Ma dassa che te conto la pedo: adesso gò descoerto che, par sora de tuto ncora, la ze na grande buziara. - Come cossita? - Si, che la zé na buziara, parche, geri sera la ze rivada casa a le trè de a matina. Lora mi ghe gò dimandà onde che la zera stata fin che a ora li. Seto cossa che la me ga dito? Che la zera stata insieme co la so sorela. - E no zera mia vero? - Nò...te digo che nò. Chi che zera insieme co la so sorela fin a le due e meza, zera mi, e nó ela. Te vidi che buziara che la ze...