Bepi l’era meso sconfià parchè ultimamente...

Bepi l’era meso sconfià parchè ultimamente el fea l’amor co la so dona, due volte al mese, quando che la ndea tuto de acordo, ma el pedo ze che, se ben che no in funsionesse mia tanto, la so dona la se gà ciapà grávida. E lu sempre con quela in testa.
Dopo de un paro de mesi che’l fioleto l’era nascesto, Bepi el gà tacà restar ancora pi nervoso e pi preocupà, parchè i cavei del toseto i vegnea sempre pi rossi, e par infiamarla ancora de pi, el so visigno el gavea anca lu i cavei rossi.
Quando che qualche dun el ghe dimandea come che podea esser che’l so fioleto el gavea i cavei rossi, se lu e la so dona li gavea negri, lu el ghe spieghea che i bisnoni i gavea i cavei rossi. Ma tanto i ghe gà sgionfà e balote, che Bepi el gà resolvesto ndar parlar co’l dotor.
– Dotor – el ghe gà dito, – come che pol esser che mi e la me dona gavemo i cavei negri, e el fioleto l’è vegnesto fora coi cavei rossi?
Alora, el dotor che l’era un grandíssimo amico suo e che’l savea de tute le sparlaciera che i disea in volta, parchè la z’era na cità picoleta, e par che Bepi no’l restesse de pi preocupà ancora, el ghe gà dimandà:
– Dime sol na roba, Bepi, quanto volte a stimana?
– Cossa? Na volta a stimana, dotor? Quando la và ben, fursi na volta al mese. E quando go tanto laoro, gnanca quela, dotor
– Ben, ben, alora se la ze cossita, Bepi, no stà preocuparte , nò. Te sé che quando se dopara poco le feramente, le ciapa a feruzem, nò. Alora, i cavei rossi del to fioleto ze stà par via de la feruzem. Sol quela...
Se la fusse cossita, ghin saria tanta gente de cavei rossi...