Quando Bepi el se gà maridà, come che l’era poareto, l’è ndà de star te a casa de la sposa, insieme co la sogra, parche el sogro, fea belche oto ani che l’era morto.

Quando Bepi el se gà maridà, come che l’era poareto, l’è ndà de star te a casa de la sposa, insieme co la sogra, parche el sogro, fea belche oto ani che l’era morto. Sol che Bepi e la sogra no i se catea mia tanto polito. Zera belche vinti e due ani che i stea insieme, ma sempre come el can e el gato. Na volta, Bepi riva casa de a colònia e la so fèmena, tuta spaurada, la ghe dize: - Quante volte te lo gò dito, Bepi, che ze par meter un ciodo più grosso onde che’l relòio l’è picà. - Ma parchè, lora? - Parchè, oncoi, squasi che sucede na desgràssia, quà casa. - Che desgràssia? - Gà sucedesto, che pena che a mama la zera passada soto, el relógio l’è cascà zò. Se’l gavesse cascà cinque segundi prima, el gavaria cascà in sima de a testa de a mama. - Gò dito mi: che’l relòio li no’l val gnente – sempre atrasado... Nantra volta, la sogra la zera mal ciapada te l’ospedal, e Bepi l’è ndà catarla. Quando che’l riva casa, la fèmena la ghe dimanda: - E lora, come stala a mama? - Te pol prontarte che doman-l’altro la càpita casa. - No ghe credo mia nò, parche, geri, quando che so’n stada là, i dotùri i me gà dito che no la passa de questa stimana. E a ti, cossa te gai dito? - A mi i me gà dito sol cossita: - Bepi, te pol prontarte pa’l pedo. Par quela che mi cato che la vien casa presto.