Bepi el gavea quatro fioi. I trè più vèci i zera ben slevai, gordi, c’un bel color e tuto quanto.

Bepi el gavea quatro fioi. I trè più vèci i zera ben slevai, gordi, c’un bel color e tuto quanto. Ma, el più gióvane dei quatro, che’l gavea nome de Zosias, l’è stà sempre mal ciapà: magreto, gambete fine, sensa color. I brassi, i parea due bìgoli picai te l’espale. Lora, Bepi la gavea su c’o sto toso. No l’era bon de capir parchê i trè più vèci i zera ben ciapai, e che l’ùltimo el fusse vegnesto fora de che a maniera li. Magari, no’l ghe gà mai parlà a so dona, ma el gavea un grandíssimo sospeto in testa. Un giorno, Bepi l’è stà tanto malà e el gà visto che deromai ndea catar San Piero. Ma come che no’l volea mia morir con che’l pensiero in testa, el gà ciamà la so dona e el ghe gà parlà: - Marieta, mi no volaria mia morir vanti de tirarme via un dùbio che gò in testa. - Ma si, Bepi, te pol dimandarme quel che te vol, che mi te parlo la pura verità. - Sol na roba, Marieta: volea dimandarte se Zosias l’è pròprio me fiol, parche l’è tanto difarente de che altri trè. - Ben, Bepi, se a ze par quela, te pol morir i pace si. Vui che’l diàgolo el me porte viva a l’inferno se so’ndrio contarte busie. E te giùro per l’ànima de me mare e per l’ànima de me pare, che Zosias l’è to fiol. Lora Bepi el gà fato na fàcia de felicità e el gà sol parlà cossita: - Ben, se a zé cossita, Cara Marieta, adesso si posso morir in pace. El gà dato l’ùltimo sufion, e dopo el gà sarà i òci par sempre. Quando che la Marieta la gà visto che Bepi l’era morto, la gà parlà intrà de ela: “ncora ben che no’l me gà mia dimandà de i altri trè...”