Bartoldo el gavea belche passà via i novanta ani, ma el se catea come che’l gavesse gnanca trenta.

Bartoldo el gavea belche passà via i novanta ani, ma el se catea come che’l gavesse gnanca trenta. Tuti i lo cognossea come un santo omo. Tute le doméneghe no’l perdea mai na messa. E sempre vanti de ndar tor la comunion, el gavea el costume de confessarse. El vigàrio, pò, no lera bon de despetolarse fora. Lora, na doménega, quando che lo gà visto là indanocià, el gà bio na idea e el ghe gà dito cossita: - Bartoldo, adesso che te ghè belche passà via i novanta ani, no ocore mia che te vegni confessarte tute le stimane, basta na volta a l’ano, parche, mi credo, che dopo de i novanta ani, no ghe ze maniere de far pecati grossi. - Nó, nò, padre – ghe gà dito Bartoldo – mi gò na múcia de pecati de confessarme. - Ben, lora sentimo che pecati che te ghè. E Bartoldo, che’l volea farse de vèder, el gà scumissià: - Mi gò na vizigna, padre, che la gà trenta due ani, e la seita végnerme drio. E come che mi no son mia un omo de scampar via de na fémena, el mese passà la gó menada te um motel, e se la gavemo passada fora tuta la note. Catio che no l’é mia pecà, padre? - Si, si... e dopo chè ncora? - Stimana passada, so’ndà a Cassia, te na casa de putane, e le gò passae tute quante. Una a una. Catio ncora che no l’é mia pecà, padre? - Ben, adesso si, Bartoldo – ghe gà dito el vigàrio – adesso si bisogna che te dae la bossolvission, parche el pedo pecato che un vecioto de novanta ani el pol far, l’è contar buzie. Và in pace, e che Dio te benedissa!