Na volta, i gà inventà de far un baile a fantasia ntel salon de’a ciesa.

Na volta,  i gà inventà de far un baile a fantasia ntel salon de’a ciesa.  Alora Bepi el ghe gà dito de incontro a la so dona:
–  Ciò, Zenaide, ndemo anca noantri a sto baile a fantasia, sol par veder come che la vien fora?
La Zenaide,  che la savea ben con chi che la zera maridada, e che l’era un mese belche che la savea de sto baile, e che la se  gavea belche comprà la so fantasia,  la gà pensà de fárghela  fianca a Bepi,  e la ghe gà respondesto:
–   Varda, Bepi, se te vol ndar, te pui ndar ti sol, che mi no gò voia de mèterme su te a fàcia che’i potaci li.
Bepi no’l gavea gnanca lu tanta voia de ndar a sto baile, parchè no’l savea gnanca balar, ma quando che’l gà visto che la Zenaide no la ndea mia, l’è resta tuto intusiasmà, el se gà comprà na fantasia, la ghe gà mostrada a la Zenaide,  e l’è ndato.
Dopo che Bepi el se gavea partio de casa, la Zenaide la gà spetà na mesa oreta, e la gà pensa: “oncoi lo ciapo. Vui sol veder se che’l maledeto là el me tradisse”.  La se gà metesto su la fantasia e la ze ndata anca ela.  Pena che la ze arivada rento ntel salon, la gà cognossesto suito la fantasia de’l so omo, la gà fato finta de esser nantra,  e la ze ndata là  balar con lu. Come che nessun cognossea nessun, lu la struchea su, la basea ntel col, cada poco el ghe parlea basseto nte’a rècia e el ghe dizea de “meu amor” quà, de “meu amor là”...de questo, de quel... el ghe fea preposte de tuti i tipi. E ela ciò, la catea de strànio de sentir Bepi a parlar de che’a maniera li e  la ridea compagna na mata de saver che lu el pensea che  ela fusse nantra. Ben, pa incurtarla, lu la gá menada fora del salon e i gà fato amor la drio del campanil de’a ciesa.
Dopo che i ze retornai ntel salon, de la un pochetin la Zenaide la ze ndata casa contenta che mai.
Quando che Bepi le rivà, la par le due de’a matina, la Zenaide la ghe gà dimandà:
–   E alora, come zeo stà sto baile? Te ga’lo piasesto?
–   Ah, che –   ghe gà respondesto Bepi –  te sè che mi no me piase mia tanto de balar. Seto cossa che gò fato? Mi so’n ndà giugar le carte co’i mei amici, la de soto del salon, e ghe gó imprestà la me fantasia a Toni,  e lu el me gà dito che’l ghi’nà ciapà una che mai... El me gà contà che la zera calda come na bronsa;  che la gá fin menada fora del salon e che i gà fato amor la de drio del campanil.
Che ciavada...