Questa quà, la ze stata la Alda Ceconello contàrmela.

Questa quà, la ze stata la Alda Ceconello contàrmela. La me gà contà che, nel tempo che la zera ncora soltera, ghe nera un sofero de camignon, quà in Frore da Cunha, che’l viaiava tanto su là par San Paulo, e quando che’l tempo no el laorea mia polito, stea fora de casa, de le volte, anca un mese, parchè le strade no le gavea mia l’asfalto gnancora, come ncoi. Ciò, sucede che lu lera maridà, e la fèmena casa, ela sola, pora can, no la zera bona de far tuta che a vigìlia li, de spetar un mese intiero che’l so omo el ritornasse. Lora, par cavarse la voia, na volta a stimana, manco, la saltea a serca. Ma due compari del motorista i gà descoerto tuto e i se gà combinà, che quando che’l rivesse casa, i ndea conterghe tuto. Come che i savea che tuti i sàbi l’omo ndea giugar le carte te a bodega, i lo gà spetà lá. Quando che l’è arivà, i lo gà ciamà de na banda e i ghe gà dito: - Noantri due, come che semo compàri de casamento, gavemo la obrigassion de contarte na roba trista, ma gavemo paura che te resti cativo. - Nò, nò, podì parlar quel che savì, parche la verità, più tàrdi o più bonora la vien fora. - Ben, lora se la ze cossita, scolta sol na roba: quando che te vè viaiar e che te resti fora de più de dieze giornade, la to fèmena la salta la serca, e savemo anca onde che la và. - Sio securi de quel che si ndrio parlar? - Securi come un ciodo novo. La gavemo vista diverse volte, co i nostri óci. Come che’l sofero el savea che i sò compari i zere invidiosi, el ghe gà dito cossita: - Ben, volio che fae chè mi? Se ghe ne de quei che i ghe và drio, ze segnal che la ze bona, e no la ze mia trista che gnanca le vostre done. Par quela, mi ve dimando na roba: par chè che no i ghe và mia drio a le vostre? Pensando ben, el gavea razon anca lu... E la Alda la me gà giurà che questa la gà sucedesto dal bon...