Savì che sti ani, le fémene le laorea in colónia tanto co fà i ómeni, ma chi che ghe metea e man ntei soldi, l’era sol l’omo.

Savì che sti ani, le fémene le laorea in colónia tanto co fà i ómeni, ma chi che ghe metea e man ntei soldi, l’era sol l’omo. Quando che i vendea la ua ntea Comperativa, l’era l’omo che ndea là tirar i soldi. Se la fémena la volesse qualche fiorin par comprarse qualche robeta, la ghe tochea dimandarghe soldi al so Omo.
La Marieta, un giorno la ghe gà parlà a Àngelo, el so omo, che la volaria anca ela aver i so soldeti par comprarse un profumo, un pó-da-ros, un baton... Alora Àngelo el ghe gà dito che la podea scóglier na porcheta ntel potrero, ingordarla e, dopo, quando che La vendesse, la podea tégnerse i soldi.
La Marieta la ze ndata ntel potrero, la se gà scogliesto fora na porcheta e la gà scuminsià tratarla de acordo: la ghe dava mangioca, panociete, pasto, sémole, tuto del meio. La porcheta, ciò, la gà tacà ingordarse fora e vegner bela, e la Marieta, belche la se insoniea coi soldi.
Dopo de sete, oto mesi, la porca la zera belche pronta. Un giorno, el compare Luigi el ghe gà mandà dir che’l volea comprarghe a porcheta. Alora, la Marieta la ghe gà dimandà a Àngelo quanto che a valea sta porca.
– La porca la val un cinquanta cunti – ghe gà dito Àngelo – Ma te pol dimandarghe anca otanta; ghe sempre tempo pa sbassar zo.
Quando che Luigi l’è rivà, la Marieta la zera belche ndrio spetarlo. Ma ntea ora de far el préssio, pa mostrarghe a Luigi che la porcheta la zera próprio de stimasson, la Marieta la gà fin ciapà la porcheta in brasso e la ghe gà dito che la volea otanta cunti. Ma sucede che quando la gà ciapà la porca in brasso, la gà ciapà el vestito insieme coa porcheta, e te sè che ne quel tempo le fémene no le doparea mia braghete par soto, de maniera che se vedea tuto el ‘panoráma’. Quando che Àngelo el gá visto che’l bruto laoro li, el ghe gà osà:
– Marieta, pa mor de Dio, sbassa zo!
– Nò che no sbasso...
– Pa’mor de Dio, Marieta, te go belche dito che te sbassi zo!
– Nò che no sbasso... No sbasso e no sbasso... La ze mia, e mi sò quanto valor che La gà...
Quando che Àngelo el gà visto che la Marieta no la capia de cossa che lu l’era ndrio parlar, el gà fato un salto e el ghe gà sbassà zo el vestito. Alora l’è stato el colpo che a Marieta la gà capio che Àngelo el volea che la sabassesse zo el vestito, nò el prèssio de a porca... Ma far chè... Luigi el gavea belche visto tuto.

*Ivo Gasparin